再會了...
嗱
美斯就係美斯
佢唔係馬勒當拿
佢可以一個扭六個
但佢性格內斂沉黙寡言
並唔係一個有感染力嘅隊長
就
如當年傑斯响曼聯踢到曉飛都好
費爵都唔會比個臂章佢
隊長其實唔需要係最出名最好波嘅
而係最肯帶動最肯溝通嘅
但
美斯雖然唔係馬勒當拿
並唔代表佢能力不及老馬
只不過大家中毒太深
硬係覺得阿根廷係球壇葉問
可以一個打十個加一個
咁
佢又真係偶然可以一個救全家
於是大家就當佢鋪舗都可以
於是阿根廷近十年有多
隨住重心一個一個退落去
列基美華朗艾馬慢慢淡出之後
阿根廷就索性一個planA玩到尾
佢响巴塞愈掂呢就愈更加令人覺得唔駛變
對
命仔得一年半載嘅輪換國家隊教練嚟講
根本冇得諗點樣重組或者試新嘢
一個國家若果唔係有由底做起嘅全盤計劃
根本就唔會有徹底嘅翻廂倒籠嘅變化
懶
其實就係懶
就如一間公司有人勤力啲抵得諗啲
咁就做死佢囉
一段關係時好時壞唔衰到分手就
繼續得過且過囉
一個導演一條橋work喎就續集再續集
直到冇人吼囉
所以
美斯之黯然退下
其實並唔係佢孭唔孭得起
而係根本上唔應該佢一個人孭曬
因為
足總冇長遠計
世青盃世少盃以前威盡依家無影
教練為保飯碗
唯有餐搵餐食不求長遠只求即食
隊友畏首畏尾
冇人夠能力夠膽色去挺身而出
當我哋開口埋口美斯可以為阿根廷攞啲乜
有冇人諗過阿根廷人究竟為美斯做過啲乜
況且
沉默寡言唔係罪
但响逆境之下清者好難可以自清
你作嘢你屈佢你嘲笑佢
美斯唔會惡言相向甚至唔會解釋澄清
於是乎蝕底嘅又係佢
美斯
唔係馬勒當拿
佢當然亦唔係超人
要美斯孭曬所有所有
其實只係一班懶人嘅一廂情願
終於
出局了夢醒了
美斯係時候退出國家隊了
就算佢可能有一絲遺憾
都唔會及得背後班懶蟲咁慘
因為美斯起碼曾經努力過
但係懶蟲們呢冇咗美斯遮醜
好快就現型醜死鬼嘞
作為阿根廷嘅球迷
我祝福美斯可以享受多啲家庭生活
同老婆拖多啲手仔同仔仔打多兩舖機
作為阿根廷嘅球迷
我會繼續支持球隊無論順逆勝敗高低
作為阿根廷嘅球迷
我會努力打拚愛錫家人鍛練自己
總之唔做懶蟲...
Search